Njoftim për fillimin e konkurimit për pjesëmarrje në tregun e filmit gjatë festivalit të Kanës, projekte fituese gjatë vitit 2024, si dhe ato në proces financimi për dy kategori.
Me hidhërim të thellë shprehim ngushëllimet për ndarjen nga jeta të artistes sonë të madhe Znj.Margarita Xhepa.
Margarita Xhepa, ishte një prej figurave të mëdha që i përkisnin plejadës së artë të skenës teatrale dhe kinematografisë shqiptare, e cila ka lënë gjurmë të pashlyeshme në kujtesën e publikut shqiptar me role të shkëlqyer që prej fillimit të saj, në vitet ’60-të të shekullit të kaluar e deri më sot.
Aktorja mbylli sytë pasi festoi ditëlindjen e saj ditën e djeshme, më 2 prill 2025.
Ajo u lind më 2 prill 1934, në Lushnjë, nga ku filloi edhe rrugëtimin e saj të gjatë e të suksesshëm në skenë dhe në ekran.
Mbresëlënës ishte ringjitja e saj në skenën e Teatrit Kombëtar, në maj 2004, me dramën “Streha e të harruarve”. Ky rikthim shënoi një tjetër arritje në repertorin e saj të pasur me role të ndryshëm.
Qysh prej fillimeve të krijimtarisë së saj artistike, në vitin 1950, merrte pjesë në shfaqjet që viheshin në skenën e Teatrit Popullor (sot Teatri Kombëtar) dhe në të njëjtën kohë kryente studimet në degën e dramës, në Liceun Artistik,“Jordan Misja”.
Repertori i roleve të saj përmban mbi 150 role në teatër, prej të cilëve mund të përmendim: Majlindën te filmi “Majlinda” (Xh. Broja), Dafina te “Lumi i vdekur” (dramatizim nga K. Velça i romanit me të njëjtin titull të Jakov Xoxës), Filja te “Cuca e maleve” (Loni Papa), Zonja Mëmë te “Kush e solli Doruntinën” (dramatizim nga Edmond Budina e Pirro Mani i romanit me të njëjtin titull të Ismail Kadaresë), Nëna te “Përballë vetes” (Ruzhdi Pulaha) etj.
Nga repertori i roleve të dramaturgëve me famë botërore, ku, gjithashtu, ka njohur suksese me interpretimin e saj, mund të përmendim interpretimin në rolet e spikatura të tragjedive të Shekspirit, si, Ofelia te“Hamleti”, vajza e dytë te “Mbreti Lir”, Dado te “Romeo e Zhuljeta”, Mbretëresha Margaret te “Rikardi III”.
Nga rolet e tjera të realizuara nga dramaturgjia botërore mund të veçojmë: Klea tek “Dhelpra dhe rrushtë” (Figereido), Lena tek “Xhaxha Vanja” (Çehov), Ledi Milford tek “Luiza Miler” (Shiler), Zonja Berling tek “Vizita e Inspektorit” (Pristli), Zonja Lomen tek “Vdekja e një Komisioneri” (A. Miller), Ana Andrejevna tek “Revizori” (Gogol), Marsela tek “Qeni i Kopshtarit” (De Vega), Mashenka tek “Mashenka” (Afigenov), Shejla tek “Morali i Zonjës Dulska” (Zapolska), apo Dado tek “Elektra” e Sofokliut, nën drejtimin e regjisorit grek Dhimitri Mavriqis, në Teatrin Kombëtar të Greqisë në Athinë.
I pasur është edhe repertori i roleve të realizuar në ekranin e madh të kinemasë, me plot 32 role.Pjesa më e madhe e tyre janë relizuar duke punuar me regjisorë shqiptarë, ndër të cilët mund të përmendim:
“Vitet e para” dhe “Gjurmët” me Kristaq Dhamon;
“Dimri i fundit”, “Tokë e Përgjakur,” “Një djalë edhe një vajzë” dhe “Apasionata”, me Ibrahim Muçajn e Kristaq Mitron;
“Gjeneral gramafoni” me Viktor Gjikën, “Rrethi i kujtesës” dhe “Vitet e pritjes” me Esat Musliun, “Dora e ngrohtë”me Kujtim Çashkun, “Gurët e shtëpisë sime”me Dhimitër Anagnostin, “Pranvera s’erdhi vetëm”, me Piro Milkanin, “Koncert në vitin 1936”, me Saimir Kumbaron, “E diela e fundit” dhe “I dashur armik”, me Gjergj Xhuvanin.
Në vitin 1997, interpretoi në filmin grek “Mirupafshim” (regjisor J. Koras, K. Vupuras). Filmi u nderua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepës, iu dha Çmimi i Nderit.
1. “Bolero në vilën e pleqve” – (2021) Firdus
2. “Në kërkim të kujt” (2011), serial
3. “Tingulli i heshtjes” (2010) telenovela
4. “Kronikë provincial” (2009)
5. “Ne dhe Lenini” (2008) – Beti
6. “I dashur armik” (2004) – Nëna e Harunit
7. “Mirupafshim” (1997)
8. “E diela e fundit” (1993)
9. “Një djalë edhe një vajzë” (1990) – Mësuese Kristina
10. “Vitet e pritjes” (1990) – Nëna e Helenës
11. “Kush e solli Doruntinën” (1989) Nëna e Kostandinit dhe Doruntinës
12. “Pesha e kohës” (1988) – Gruaja e Kryetarit
13. “Pranvera s’erdhi vetëm” (1988) Nëna e Irenës
14. “Misioni përtej detit” (1988) – Kristulla
15. “Rrethi i kujtesës” (1987) – Tefta
16. “Fillim i vështirë” (1986) Shoqja e Zanës
17. “Gabimi” (1986) – Mësuesja
18. “Gurët e shtëpisë sime” (1985) – Gruaja e Fane Mërtirit
19. “Militanti” (1984) – Nëna e Visar Shundos
20. “Apasionata” (1983) – Nëna e Arturit
21. “Dora e ngrohtë” (1983) – Nëna e Besimit
22. “Shokët” (1982) – Nëna e Gencit
23. “Dita e parë e emërimit” (1981) – Drita
24. “Me hapin e shokëve” (1979) (TV) – Mamaja e Gonit
25. “Dollia e dasmës sime” (1978) – Nëna e Belës
26. “Gjeneral gramafoni” (1978) – Zonja e Prefektit
27. “Koncert në vitin 1936” (1978) – Eleni Jankollari
28. “Dimri i fundit” (1976) – Shano
29. “Pylli i lirisë” (1976) – Nënë Katja
30. “Tokë e përgjakur” (1976) – Sandra
31. “Gjurma” (1970) – Violeta
32. “Vitet e para” (1966) – Zyraka
Qendra Kombëtare e Kinematografisë fton të gjithë kineastët, producentët dhe shtëpitë kinematografike të aplikojnë për projekte në këto kategori:
• PROJEKTE FESTIVALESH FILMI (dokumentacioni është i njejtë si për “projektet të ndryshme kinematografike”)
• PROJEKTE PËR VEPRA AUDIOVIZUALE (seriale)
• PROJEKTE TË NDRYSHME KINEMATOGRAFIKE (kualifikim, specializim, përgatitje dhe trajnim në vazhdim të kineastëve shqiptarë, konferenca, seminare, punëtori, dhe aktivitete të tjera kinematografike)
Afati i fundit për aplikime: 28 mars 2025, ora 14:00
SI TË APLIKONI?
Dokumentacion elektronik: Dërgojeni në info@qkk.gov.al përmes platformave «file sharing».
Dokumentacion fizik: Dorëzojeni pranë zyrës së arkivës dhe protokollit të QKK-së.
Kujdes: Producentët duhet të jenë të regjistruar pranë QKK-së për vitin 2025 përpara aplikimit.
Kryetari i QKK, Eol Çashku, dhe Drejtorja Soena Lame, mbajtën një takim zyrtar me Drejtoren Ekzekutive të Eurimages, znj. Susan Newman Baudais, dhe Zv. Drejtorin Enrico Vannucci, në tregun e filmit të Festivalit Ndërkombëtar të Filmit në Berlin.
Gjatë takimit, u ndanë shqetësimet dhe vlerësimet e komunitetit të kineastëve shqiptarë me drejtuesit e Eurimages, si dhe u diskutua mbi Konventat Evropiane që do të miratohen nga Këshilli i Evropës në të ardhmen e afërt.
Shqipëria është anëtare e Eurimages që prej vitit 2008 dhe ka përfituar mbështetje për disa bashkëprodhime kinematografike.
QKK mori pjesë në Industry Days të edicionit të sivjetshëm të FIPADOC / Balkan Focus Biarritz, Francë, ku rajoni i Ballkanit ishte në qendër të vëmendjes me punëtori, panele, prezantime projektesh dhe autorë nga rajoni. Diskutimi me moderatoren e panelit Rada Šešić (Cinelink Industry Days & Sarajevo Film Festival) solli një panoramë të përgjithshme mbi dokumentarin kinematografik, festivalet dhe qendrat kombëtare të kinematografisë të Evropës juglindore. Për herë të parë në 2024, QKK ka filluar të mbështesë koproduksione ndërkombëtare në pakicë (minority copeoductions) për dokumentarin kinematografik me metrazh të gjatë, duke krijuar mundësi të reja të zhvillimit të këtij sektori.
Të nderuar kineastë, producentë e administratorë të shtëpive kinematografike,
Qendra Kombëtare e Kinematografisë shpall njoftimin për konkurrim me projekte kinematografike në këto kategori:
(a) filma me metrazh të gjatë vepër e parë dhe e dytë;
(b) zhvillim projektesh për filma me metrazh të gjatë.
Paraqitja e dokumentacionit për aplikim, prej producentëve, duhet të realizohet, njëkohësisht, në këto dy mënyra:
(i) Dokumentacion i ruajtur në skedarë elektronikë të dërgohet në adresën e-mail info@qkk.gov.al, nëpërmjet platformave «file sharing», që janë përcaktuar në «Rregulloren e përgjithshme të mbështetjes financiare dhe lejeve» me №60 prot., datë 27.01.2025;
(ii) Dokumentacion origjinal dhe/ose i njësuar me origjinalin të dorëzohet pranë zyrës së arkivës dhe protokollit të QKK-së.
Producentët duhet të jenë të regjistruar në QKK për vitin 2025, përpara se të aplikojnë.
Afati i aplikimeve përfundon më datë 28 shkurt 2025, ora 14:00.
Përpara se të aplikoni, konsultoni me kujdes kriteret dhe rregullat të konkurrimit, të parashikuara në «Rregulloren e përgjithshme të mbështetjes financiare dhe lejeve», e cila gjendet në URL-në: https://qkk.al/index.php/rregulloret-e-qkk/rregullore-e-pergjithshme-e-mbeshtetjes-financiare-dhe-lejeve/
Dokumentacioni, për secilën nga kategoritë për konkurrim, gjendet në URL-në: https://qkk.al/index.php/formulare-aplikimi-2024/.
Duke ju falenderuar, paraprakisht, për bashkëpunimin Tuaj,
Me respekt,
KRYETARI
EOL ÇASHKU
Janar 2025 ― Thirrje për Projekte Filmash me Metrazh të Gjatë Vepër e parë dhe e dytë / Zhvillim Projektesh për Filma me Metrazh të Gjatë
Shkurt 2025 ― Thirrje për Projekte Festivalesh Filmi / Thirrje për Projekte për Vepra Audiovizuale / Thirrje për Projekte të ndryshme kinematografike
Mars 2025 ― Thirrje për Projekte Filmash Artistikë me Metrazh të Gjatë / Projekte për Filma me Metrazh të Shkurtër
Prill 2025 ― Projekte për Koproduksione në Pakicë (minority) / Projekte për Filma të Animuar / Projekte për Promovimin e Kinematografisë Shqiptare jashtë dhe brenda vendit
Maj 2025 ― Projekte për Postproduksion & Distribucion / Projekte për Filma Dokumentarë
Qendra Kombëtare e Kinematografisë njofton të gjithë kineastët lidhur me hyrjen në fuqi, më datë 27 janar 2025, të rregullores së re, të përgjithshme të mbështetjes financiare & lejeve.
Kjo rregullore gjendet në URL-në: https://qkk.al/rregulloret-e-qkk/rregullore-e-pergjithshme-e-mbeshtetjes-financiare-dhe-lejeve/.