Category: Njoftime

QKK, në mbledhjen e Asamblesë së Përgjithshme të EFAD

13/12/2024

Kryetari i QKK-së, Z. Eol Çashku dhe Drejtorja e Drejtorisë së Projekteve, Znj. Grejs Gjergji, më datë 11 dhjetor 2024, morën pjesë në mbledhjen e Asamblesë së Përgjithshme të EFAD-it (Organizata Evropiane e Drejtuesve të Agjencive të Filmit) që u mbajt në Bruksel.

Përfaqësuesit e QKK u përfshinë në grupe pune të EFAD. Grupi: Edukimi Kinematografik, Grupi: Financimi i filmit si mbrojtës i lirisë së krijimtarisë ndaj ndërhyrjeve politike, Grupi: Detyrimet Financiare të VoD.

Në këtë takim morën pjesë rreth 40 delegatë nga 25 organizata anëtare.

Mbledhja u zhvillua mbi bazën e një platforme dinamike ku u diskutua mbi çështje kritike strategjike me të cilat përballen institucionet e kinematografisë dhe sektori audioviziv më gjerësisht.

Rendi i ditës përmbante dy sesione të veçanta me dy tema kryesore për diskutim:

1. “EFAD Looking Forward: Vision for 2030” – Një sesion që hulumtoi sprovat e së ardhmes dhe drejtimet strategjike për EFAD-in.

2. “Trajtimi i çështjeve aktuale” – Në këtë sesion u trajtuan një gamë e gjerë temash, që përfshinë:
o Aplikime praktike të IA-së për agjencitë filmike;
o Rëndësia e edukimit përmes filmit;
o Ruajtja e financimit të filmit si mbrojtës i lirive kundrejt ndërhyrjeve politike;
o Detyrimet financiare të platformave VoD;
o Ruajtja e pronësisë intelektuale dhe roli i producentëve të pavarur.

Kjersti Mo, Zëvendës President i EFAD-it, theksoi vlerën e shkëmbimeve të tilla bashkëpunuese, duke thënë: “Ky takim interaktiv dhe pjesëmarrës tregoi edhe një herë se EFAD ofron një platformë unike për shkëmbimin e praktikave më të mira për financimin e filmit dhe adresimin e politikave në bazë të sfidave kryesore me të cilat përballemi. Energjitë tona çlirohen kur bëhemi bashkë dhe mësojmë nga iniciativat dhe pikëpamjet e njëri-tjetrit. Diçka e tillë është e një rëndësie vendimtare për të gjetur frymëzim dhe zgjidhje të përbashkëta për të ardhmen.”

Presidenti i EFAD-it, Chris Marcich, theksoi më tej angazhimin e organizatës për promovimin e larmisë kulturore në nivel evropian. Ai nënvizoi rolin kryesor të EFAD-it në mbështetjen dhe nxitjen e politikave që mbrojnë dhe promovojnë krijimin audiovizual evropian dhe vendor kundër presioneve nga interesat jo-evropiane. “EFAD mbetet i palëkundur në mbështetjen e anëtarëve të tij dhe qeverive përkatëse në përballimin e përpjekjeve që lidhen me cënimin e dispozitave ekzistuese të cilat mbështesin larminë kulturore dhe ekosistemin audiovizual evropian.”

Themeluar zyrtarisht sipas ligjit belg në dhjetor 2014, organizata po i afrohet 10 vjetorit të saj dhe EFAD pret me padurim të festojë këtë moment historik të rëndësishëm. Planet, tashmë, janë
duke u zhvilluar për një ngjarje të veçantë për këtë përvjetor, që do të zhvillohet gjatë Festivalit të Filmit në Kanë në vitin e ardhshëm 2025.


© Erlend Štaub, EFAD


© Erlend Štaub, EFAD


© Erlend Štaub, EFAD


© QKK


© QKK


© QKK

QKK, në Komisionin për edukimin dhe mjetet e informimit publik, për buxhetin e vitit 2025

11/11/2024

Kryetari i Qendrës Kombëtare të Kinematografisë, Z.Eol Çashku, morri pjesë në seancën dëgjimore për diskutimin në parim të projektligjit «Për Buxhetin e Vitit 2025» në Komisionin Parlamentar për Edukimin dhe Mjetet e Informimit Publik të Kuvendit të Shqipërisë.

Në këtë seancë, deputetët e Kuvendit u informuan mbi problemet e zbatimit të paplotë të Ligjit për Kinematografinë ndër vite, pasojat e dhimbshme mbi të gjithë sistemin kinematografik dhe audiovizual në vendin tonë, si dhe përpjekjet aktuale të QKK-së, në drejtim të përmbushjes së normave të përjashtimit kulturor evropian.

Deputetë e pranishëm në seancë dhanë mirëkuptimin dhe mbështetjen për përpjekjet e QKK-së në drejtim të zbatimit të ligjit për zhvillimin e qëndrueshëm të sektorit kinematografik dhe audiovizual shqiptar.

Shfaqen filmat me metrazh të gjatë «Sirin» & «Lejleku» në kuadër të Javëve Kulturore Ndërkombëtare në kinemanë e AFM «Marubi»

10/11/2024

Në kuadrin e Javëve Kulturore Ndërkombëtare, të organizuar nga Ministria e Ekonomisë, Kulturës dhe Inovacionit, patëm kënaqësinë e veçantë të merrnim pjesë në Kinemanë «John & Jim» të Akademisë së Filmit dhe Multimedias Marubi, në Kinostudio, në shfaqjen e filmave artistikë me metrazh të gjatë, «Sirin», me regji të Senad Sahmanović, me producent shqiptar Dritan Huqi, si dhe «Lejleku», me regji të Isa Qosja, me producent shqiptar Florenc Papas.

Të dy filmat janë mbështetur financiarisht nga Qendra Kombëtare e Kinematografisë si koproduksione në pakicë. Filmat u pritën me interes nga publiku. Pas shfaqjeve u mbajtën sesione pyetje/përgjigje mes shikuesve, autorëve e producenteve nga të dy vendet dhe Zj. Alexandra Bozović, Drejtore menaxhuese e Qendrës së Filmit të Malit të Zi, dhe e Kryetarit të Qendrës Kombëtare të Kinematografisë Z. Eol Çashku.

Drejtuesit e qendrave homologe diskutuan me publikun dhe kineastët e pranishëm mbi rritjen e mbështetjes për krijimtarinë audiovizive si dhe për fillimin e përpjekjeve të përbashkëta për qarkullimin e filmave dhe produkteve audiovizuale përmes mbështetjen së distribucionit dhe difuzionit.

SEE Cinema Network përzgjedh projektet për financim, në sesionin e saj të 37

07/11/2024

Sesioni i 37-të i Asamblesë së Përgjithshme të SEE Cinema Network u zhvillua më 6 nëntor 2024 në Selanik. Ai përkoi me edicionin e 65-të të Thessaloniki International Film Festival. Rrjeti i Kinemasë SEE shpalli vlerën e përgjithshme të financimit prej €72,000 për konkurentët e Raundit të Financimit 2024. Projektet e përzgjedhura u shpallën zyrtarisht gjatë ndarjes së çmimeve Agora të Festivalit.

Çdo projekt i përzgjedhur do të financohet në shumën €9000 për t’u zhvilluar.

Projektet në zhvillim, të përzgjedhura për t’u financuar janë:

SHQIPËRIA
AFTER DARK
Regjisor: Erenik Beqiri
Producent: On Film Production
Shqipëria / Greqia / Franca / Italia / Danimarka

BULLGARIA
CONTRE JOUR
Regjisor: Antonia Milcheva
Producent: Contrast Films
Bullgaria / Rumania

QIPRO
YIANNIS
Regjisor: Kyros Papavassiliou
Producent: Drytree Films Ltd
Qipro / Greqia / Rumania

GREQIA
WAKE
Regjisor: Thelyia Petraki
Producent: Out of the Box Films
Greqia / Qipro / Serbia

KOSOVA
VESTIGE
Regjisor: Rita Krasniqi
Producent: Kot Productions
Kosova / Maqedonia e Veriut / Franca

MALI I ZI
SOBE
Regjisor: Pavle Simonović
Producent: Protos Film
Mali i Zi / Serbia

MAQEDONIA E VERIUT
I DISAGREE
Regjisor: Kristijan Risteski
Producent: Focus Pocus Films
Maqedonia e Veriut / Qipro / Franca

RUMANIA
EDELWEISS
Regjisor: Adriana Racasan, Tudor Giurgiu
Producent: Point Film
Rumania / Qipro

Nisën xhirimet e filmit «Ajo që mbetet»

25/10/2024

Nisën xhirimet e filmit «Ajo që mbetet/She who remains», me regji të Kostadin Bonev.

Filmi është një koproduksion i kompanive:
• Trivium Film (Bulgaria) – Kostadin Bonev
• Papadhimitri Film production (Albania) – Dionis Papadhimitri
• L’age d’or (Italy) – Angela Prudenzi, Alfredo Fiorillo

Ky film është financuar nga Qendra Kombëtare e Kinematografisë si koproduksion në pakicë.

«Yjet e së ardhmes» fiton çmimin «Filmi më i Mirë Ndërkombëtar» në Festivalin Ndërkombëtar të Filmit «Castelli Romani 2024» (CRoFFI)

17/10/2024

«Yjet e së ardhmes» fiton çmimin «Filmi më i Mirë Ndërkombëtar» në Festivalin Ndërkombëtar të Filmit «Castelli Romani 2024» (CRoFFI). Ky film u financua nga Qendra Kombëtare e Kinematografisë.

Festivali Ndërkombëtar i Filmit «Castelli Romani» (CRoFFI), një festival me një prani të lartë yjesh të kinematografisë italiane dhe ndërkombëtare, zhvilloi Edicionin e tij të Tetë në datat 4-11 Tetor 2024 në Ariçia (Romë). Konkurimi u zhvillua në kategoritë e Filmit të Shkurtër dhe Filmit me Metrazh të Gjatë, ku u përfshinë 54 Filma të Shkurtër, nga mbi 15 vende të botës dhe 11 Filma me Metrazh të gjatë, nga Shqipëria, Italia, Bullgaria, Gjermania dhe Franca.

Oferta filmike u ndoq nga publiku në Grottaferrata – Cinema Alfellini, Frascati – Cinema, pallati Chigi – Ariçia dhe online në CROFFI TV.

Konkurimin në këto kategori e ndoqi Juria Qendrore, e përbërë nga: Mimmo Calopresti – president (regjisor, skenarist dhe aktor), Janet De Nardis – regjisore dhe skenariste, Stefano Masciarelli – aktor, Stefano Reali – regjisor, Stefania Casini – regjisore, aktore, Blas Roca Rey – aktor, Josephine Alessio – gazetare (Rai News 24), Massimo Spano – regjisor dhe producent, Morena Gentile – aktore dhe producente, Alessandro Pondi – regjisor dhe Teresa Razzauti – regjisore kastingu dhe Juria e Medias, e përbërë nga: Elisabeth Missland, Dundar Kesapli, Luciano Sciubra, Sergio Fabi, Flavia Arcangeli, Alba Kepi, Ettore Giuffrida,l Vera Naydenova, Paola Medori dhe Marta Coco.

Në konkurimin e Filmit të Shkurtër u ndanë 22 çmime, tetë prej të cilëve çmime për aktorët protagonistë dhe joprotagonistë, çmimet «Filmi më i Mirë», «Fotografia më e Mirë» dhe «Regjia më e Mirë», disa çmime karriere si edhe çmimet e Kritikës, Medias dhe Publikut. Në konkurimin e Filmit me Metrazh të Gjatë u ndanë 23 çmime, tre prej të cilëve çmime karriere për aktorët protagonistë, joprotagonistë dhe ndërkombëtarë, çmimet “Filmi më i Mirë”, “Filmi më i Mirë Ndërkombëtar” dhe “Regjia më e Mirë” si edhe çmimet e Kritikës, Medias, Publikut dhe rrjeteve sociale.

Filmi «Yjet e së ardhmes» (Skenarist – Uli Bree, Regjisor dhe producent – Edmond Topi, – Drejtor fotografie – Leonard Qendro, Konsulent Artistik – Mirela Oktrova, Kompozitor – Saimir Çili, Montazhi: Eliodor Markja, Grimi dhe kostumet – Bebeka Alla, Interpretues – Tinka Kurti (Nderi i Kombit), Reshat Arbana (Nderi i Kombit), Margarita Xhepa (Nderi i Kombit), Luftar Paja (Mjeshtër i Madh), Gazmend Paja, Elia Zaharia, Ema Andrea, Sadush Ylli, Karafil Shena, Bajram Dosti, Igli Zarka, Jorida Meta) ia doli të rrëmbente zemrat e publikut dhe të tërhiqte vëmendjen e jurisë, e cila e vlerësoi si «Filmi më i Mirë Ndërkombëtar».

Publiku roman dhe jo vetëm u entuziasmua dhe emocionua nga historia e bandës së të moshuarve “të rinj”, «Robi dhe Trinitrina» dhe vullneti i tyre për ta jetuar jetën deri në fund dhe me të gjithë fuqinë…, pavarësisht të papriturave të jetës… interpretuar me mjeshtëri nga Tinka Kurti, Reshat Arbana, Margarita Xhepa dhe Luftar Paja. Bashkudhëtari dhe nxitësi i tyre, Robi (Gazmend Paja) është një artist ende i “pashpërthyer”. Prej vitesh bën muzikë por ende nuk është i njohur. Mendon se kjo mundësi do t’i krijohet nëse, me formacionin e tij muzikor arrin të fitojë konkursin kombëtar «Yjet e së ardhmes». Por sherrosja në një lokal e shpie në gjyq, ku i kanoset burgu… Kur gjykata ia konverton dënimin me punë në dobi të komunitetit, ai përfundon në një shtëpi të moshuarish, ku ka shefe fqinjën (Elia Zaharia), të cilën e “torturon” përnatë me muzikën tij. Temperamenti prej artisti e miqëson shpejt me të moshuarit, të cilëve u rizgjon dëshirën për të jetuar dhe e afron me vajzën, e cila e njeh nga një plan tjetër. Po puna është me orë të zgjatura, ndaj formacioni i tij e zëvendëson… Tentativa për të bërë një kor me të moshuarit, shihet si shkelje nga drejtoresha (Ema Andrea), e cila e largon nga puna dhe njofton gjykatën. Pa formacion dhe me një këmbë në burg, duket se ëndrra u gropos përfundimisht, derisa “miqtë” e moshuar e ftojnë të krijojë një formacion me ta. Sado e çmendur, ideja funksionon: ata ushtrohen rregullisht fshehurazi drejtoreshës që mbikqyr të moshuarit dhe policisë që kërkon artistin. Edhe “zbulimi” dhe më pas përplasja me drejtoreshën, jo vetëm që nuk i paralizon, por i bën të moshuarit „heronj“, të publikut dhe të të rinjve…, pavarësisht moshës dhe të papriturave, që ajo “ruan” për ta…

Festivali Ndërkombëtar i Filmit «Castelli Romani» (CRoFFI) – është një ngjarje e rëndësishme kinematografike, me fokus kryesor te produksionet e pavarura. Duke e konsideruar kinemanë si një mjet i rëndësishëm promovimi për rajonin Castelli Romani, i njohur për veçoritë e tij historike, kulturore, arkitekturore dhe ofertat eno-gastronomike, organizatorët e festivalit (shoqata «Punto e Virgola 2017»), synojnë, që përmes personaliteteve të njohura të kinemasë italiane dhe ndërkombëtare, të tërheqin më shumë vëmendjen e turistëve, të cilët shpesh ndalen vetëm në Romë pa zbuluar thesaret e mrekullueshme të Castelli Romani.

Festivali Ndërkombëtar i Filmit «Castelli Romani» (CRoFFI) e zhvilloi ceremoninë e ndarjes së ccmimeve të Edicionit të tij të Tetë (4-11 Tetor 2024) në mjediset e mrekullueshme të Pallatit dukal Ariçia (Romë) – një shembull unik i një rezidence baroke të konservuar në kontekstin e saj arkitekturor, urban dhe peizazhor.

Amatorët e kinemasë, e kanë të njohur pallatin, si kulisën historike të njërit prej filmave më të ndjekur të kinematografisë italiane dhe botërore, «Leopardi» («Il Gatopardo», Luchino Visconti – 1963), me të paharrueshmit: Burt Lancaster, Alain Delon dhe Claudia Cardinale.